تېببىي پەنلەر دوكتورى مۇتەللىپ ھامۇت (ئاۋسترالىيە)

دوختۇر ئىسمى: تېببىي پەنلەر دوكتورى مۇتەللىپ ھامۇت (ئاۋسترالىيە) | ئۇنۋانى: | بۆلۈم ئايرىمىسى:
خىزمەت ئورنى: | ئاۋاتلىقى: قېتىم


دوكتور مۇتەللىپ ھامۇت ئاقسۇ ۋىلايىتىنىڭ ئونسۇ ناھىيەسىدە ئوقۇتقۇچى ئائىلىسىدە دۇنياغا كەلگەن. مۇتەللىپ كىچىكىدىنلا ئىنتايىن تىرىشچان بالا ئىدى. باشلانغۇچ مەكتەپكە كىرىشتىن بۇرۇنلا ئوقۇتقۇچى ئاپىسىنىڭ ياردىمىدە ساۋاتىنى چىقىرىپ ھەم نۇرغۇن دەرسلىكلەرنى ئۆگىنىپ بولغاچقا، ئۇ 1-يىللىققا كىرىپ بىر قانچە ئايدىن كېيىنلا سىنىپ ئاتلاپ، باشلانغۇچ مەكتەپنى 3-سىنىپتىن باشلاپ ئوقۇيدۇ. 1985-يىلى ئونسۇ ناھىيەلىك 3-ئوتتۇرا مەكتەپتە تولۇقسىزنى پۈتتۈرۈپ، ئوتتۇرا تېخنىكوم ئىمتىھانىغا قاتنىشىپ، ئەلا نەتىجە بىلەن شىنجاڭ نېفىت مەكتىپىگە قوبۇل قىلىنىدۇ. مۇتەللىپ كىچىكىدىنلا تىل ئۆگىنىشكە ناھايىتى قىزىقاتتى. شۇڭا ئۆزىنىڭ شىنجاڭ تاشقى سودا مەكتىپىدە ئىنگلىز تىلى كەسپىدە ئوقۇش ئارزۇسى ئەمەلگە ئاشمىغانلىقى ئۈچۈن، ئوقۇش باشلاپ بىر ئايدىن كېيىن، بۇ مەكتەپتە داۋاملىق ئوقۇشتىن ۋاز كېچىپ، يۇرتىغا قايتىپ تولۇق ئوتتۇرىدا ئوقۇشنى باشلايدۇ.  مۇتەللىپ باشلانغۇچ مەكتەپتىن تارتىپ تولۇق ئوتتۇرا مەكتەپنى تۈگەتكۈچە ئىزچىل ھالدا سىنىپىنىڭ ئۆگىنىش ھەيئىتى، ۋە دەرستىن سىرتقى خىمىيە گۈرجىكىدە باش تەشكىللىگۈچى ۋەزىپىسىنى ئۆتەيدۇ.

 


مۇتەللىپ 1988-يىلى ئونسۇ ناھىيەلىك 1-ئوتتۇرا مەكتەپنى پۈتتۈرگەندىن كېيىن، ئەلا نەتىجە بىلەن شىنجاڭ تېببىي ئۇنىۋېرسىتېتىنىڭ كىلىنىكىلىق داۋالاش كەسپىگە قوبۇل قىلىنىدۇ. ئوقۇشقا كىرگەندىن كېيىن ئۆزىگە قاتتىق تەلەپ قويۇپ، كېچە-كۈندۈز ئىخلاس بىلەن تىرىشىدۇ. ئالىي مەكتەپكە كىرىش ئىمتىھانىدا خەنزۇ تىلىدا 97 نومۇر (تولۇق نومۇر 100 نومۇر ئىدى) ئالغان بولغاچقا، 1-يىلى تەييارلىق سىنىپىدا خەنزۇ تىلى تېز سىنىپقا تاللىنىدۇ.  ئۇ كەسپى خەنزۇ تىلى ۋە كەسپى تېببىي دەرسلەرنى تېرىشىپ ئۆگەنگەندىن سىرت، ئىنگلىز تىلى ئۆگىنىشكە بولغان ئىشتىياقىنىڭ تۈرتكىسىدە، ھەر كۈنى ئۆزلۈكىدىن ئىنگلىز تىلى ئۆگىنىشنى داۋاملاشتۇرىدۇ. دەرستىن سىرتقى ئىنگلىز تىلى كۇرسلىرىغا قاتنىشىدۇ. ھەر كۈنى ئەتىگەن سەھەردە ئىنگلىزچە خام سۆزلەرنى يادلايدۇ. چۈشلۈك دەم ئېلىش ۋاقتىدا ئالدى بىلەن مەكتەپ كۇتۇپخانىسىغا كىرىپ، «جۇڭگو كۈنلۈك گېزىتى» ۋە «ئىنگلىز تىلى دۇنياسى»  نى ئوقۇيدۇ. شۇ سەۋەبتىن دائىم ئاشخانىدا ئېشىپ قالغان تاماقلارنى يېيىشكە رازى بولىدۇ. مۇشۇنداق ئۈزلۈكسىز تىرىشچانلىقنىڭ تۈرتكىسىدە،  1993-يىلى 12-ئايدا دۆلەتلىك ئالىي مەكتەپ ئىنگلىز تىلى 4-دەرىجىدىن ئۆتىدۇ.  بۇ شىنجاڭ تېببىي ئۇنىۋېرسىتېتى تارىخىدىكى ئانا تىل بىلەن ئالىي مەكتەپكە كىرگەن ئوقۇغۇچىلار ئىچىدىكى  تۇنجى رېكورت ئىدى. ئارقىدىنلا، يەنى 1994–يىلى 1–ئايدا، مۇتەللىپ دۆلەتلىك ماگىستىر ئاسپىرانتلار ئىمتىھانىدىن ئۆتۈپ، شىنجاڭ تېببىي ئۇنىۋېرسىتېتى تارىخىدىكى تۇنجى ئانا تىل بىلەن ئالىي مەكتەپكە كىرىپ ماگىستىرلىققا ئۆتكەن 2 ئۇيغۇر ئوقۇغۇچىنىڭ بىرى بولىدۇ (يەنە بىرى ئاياللار ئۆسمە كېسەللىكلىرى دوختۇرى گۈزەلنۇر ئابلىز). بۇ يەردە تەكىتلەپ ئۆتۈشكە تېگىشلىكى شۇكى، ئەينى ۋاقىتتا شىنجاڭ تېببىي ئۇنىۋېرسىتېتىدا ئۇيغۇر ئوقۇغۇچىلارغا ئىنگلىز تىلى دەرسى ئۆتۈلمەيتى. لېكىن، ماگىستىرلىققا كىرىش ئۈچۈن ئىنگلىز تىلى ئىمتىھانىدا چوقۇم لاياقەتلىك بولۇش تەلەپ قىلىناتتى.  ئۇنىڭدىن سىرت سىياسەت دەرسلىرى ئانا تىلدا ئۆتۈلگەن بولسىمۇ، دۆلەتلىك ماگىستىرلىققا كىرىش ئىمتىھانىدا سىياسەتنى خەنزۇ تىلىدا بېرىش تەلەپ قىلىناتتى. قالغان 3 ئىمتىھان تۈرى تېببىي كەسپىي پەنلىرى ئىدى. تېببىي ئۇنىۋېرسىتېتىنىڭ ئاخىرقى يىلى ئوقۇغۇچىلار دوختۇرخانىلاردا ئەمەلىي پىراكتىكا بىلەن ناھايىتى ئالدىراش ئۆتىدىغان بولسىمۇ، مۇتەللىپ قىسقىغىنا نەچچە ئاي ئىچىدە ئۆزىنىڭ قاتتىق تىرىشچانلىقى بىلەن، تېببىي ئۇنىۋېرسىتېتى تارىخىدا 2 چوڭ بۆسۈشنى قولغا كەلتۈردى. بۇ نەتىجىلەر كېيىنكى يىللىق ئوقۇغۇچىلارغا چوڭقۇر ئىلھام ۋە تۈرتكە بولدى. ئۇنىڭدىن كېيىن ھەر يىلى 2-3 ئۇيغۇر ئوقۇغۇچىلار تېببىي ئۇنىۋېرسىتېتى ماگىستىرلار قوشۇنىغا قوشۇلۇپ ماڭدى، ۋە بۇ قوشۇن داۋاملىق زورايدى.

مۇتەللىپ يەنە 1994–يىلى شۇ قاراردىكى 125 ئوقۇغۇچىنىڭ ئىچىدە ئىلمىي نەتىجىسى 1–بولۇپ ئوقۇش پۈتتۈردى. ئۇ 1994-يىلىدىن 1998–يىلغىچە داڭلىق يۈرەك كېسەللىكلەر مۇتەخەسسىسى روزى ھاجى مۇھەممەدنىڭ يېتەكچىلىكىدە، يۈرەك كېسەللىكلىرى بويىچە ماگىستىر ئاسپىرانتلىقنى تاماملايدۇ. بۇ جەرياندا 1995-يىلى  مۇتەللىپ يەنە دۆلەتلىك ئالىي مەكتەپ ئىنگلىز تىلى 6-دەرىجىدىن ئۆتىدۇ. بۇ تېببىي ئۇنىۋېرسىتېتى تارىخىدىكى يەنە بىر يېڭى رېكورت ئىدى.  مۇتەللىپ ماگىستىر تەتقىقاتىنى خوتەندە ياشانغان ئۇيغۇرلاردىكى يۇقىرى قان بېسىم كېسىلى ئۈستىدە ئېلىپ بارغان بولۇپ، تەتقىقات نەتىجىلىرى دۆلەت ئىچى ۋە سىرتىدىكى ئىلمىي ژۇرناللاردا ئېلان قىلىنىدۇ. ئۇ ماگىستىرلىق ئوقۇشىنى تاماملىغاندىن كېيىن، شىنجاڭ تېببىي ئۇنىۋېرسىتېتى قارمىقىدىكى 1-دوختۇرخانىدا يۈرەك كېسەللىكلەر بۆلۈمىدە خىزمەت قىلىدۇ. خىزمەت جەرياندا مۇتەللىپ ئۆزىنىڭ بىلىم سەۋىيەسىنى تېخىمۇ ئۆستۈرۈش ئۈچۈن توختىماي  ئىزدىنىدۇ. ئىنگلىز تىلى سەۋىيەسىنى داۋاملىق ئۆستۈرۈپ، ئامېرىكا ۋە غەرب ئەللىرىدە ئوقۇماقچى بولغان چەت ئەللىك ئوقۇغۇچىلاردىن ئېلىنىدىغان تىل ئىمتىھانى TOEFL  ۋە GRE  قاتارلىقلاردا ياخشى نەتىجىلەرگە ئېرىشىدۇ، ھەمدە ئامېرىكا ۋە كانادادىكى تېببىي ئۇنىۋېرسىتېتلارنىڭ دوكتورلۇق ئوقۇش چاقىرىقلىرىنى تاپشۇرۇپ ئالىدۇ. بىراق، تېببىي پەنلەردە چەت ئەللىك ئوقۇغۇچىلارغا بېرىلىدىغان ئوقۇش مۇكاپات پۇلى بەكمۇ چەكلىك بولغاچقا، ھەمدە ئۆز ئىقتىسادى بىلەن ئوقۇش يار بەرمىگەچكە، يۇقىرىقى مەكتەپلەرگە ئوقۇشقا بېرىشقا ئامالسىز قالىدۇ.

مۇتەللىپ 2000-يىلى دۆلەتلىك سەھىيە مىنىستىرلىقىنىڭ چەتئەلگە چىقىپ بىلىم ئاشۇرۇدىغانلار ئىنگلىز تىلى ئىمتىھانىدا ئاپتونوم رايون بويىچە بىرىنچى بولىدۇ، ھەمدۇ. ھەمدە  ياپونىيەگە بېرىپ بىر يىللىق بىلىم ئاشۇرۇش پۇرسىتىگە ئېرىشىدۇ. لېكىن  ئىنگلىز تىلى قوللىنىدىغان دۆلەتلەرگە بېرىش ئارزۇسى كۈچلۈك بولغاچقا، ياپونىيەگە بېرىشنى رەت قىلىدۇ. ئۇ ئاخىرى، 2002-يىلى  خەلقئارا سەھىيە تەشكىلاتى ئوقۇش مۇكاپاتىغا  ئېرىشىدۇ. بۇ مۇكاپاتقا مەملىكەت بويىچە ئارانلا 26 كىشى تاللانغان بولۇپ، مۇتەللىپ پۈتۈن ئۇيغۇر دىيارى بويىچە تاللانغان بىردىن-بىر نامزات ئىدى.  مۇتەللىپ 2003-يىلى 4-ئايدا ئاۋسترالىيەنىڭ سىدنى شەھىرىگە كېلىپ Prince of Wales دوختۇرخانىسىدا 6 ئايلىق يۈرەك كېسەللىكلىرى بويىچە بىلىم ئاشۇرۇشنى باشلايدۇ. 2004-يىلى، بۇرۇنقى ئەلا ئوقۇش ۋە تەتقىقات  نەتىجىلىرى ۋە يۇقىرى ئىنگلىز تىلى نەتىجىلىرى بىلەن ئاۋسترالىيەنىڭ دۆلەتلىك ئوقۇش مۇكاپاتىغا (Endeavour International Postgraduate Research Scholarship:IPRS) ئېرىشىپ، Newcastle ئۇنىۋېرسىتېتىدا دوكتورلۇق ئوقۇشىنى باشلايدۇ.  شۇ يىلى Newcastle ئۇنىۋېرسىتېتىدا بۇ مۇكاپاتقا ئېرىشكەن چەتئەللىك ئوقۇغۇچىلار پەقەت 6 كىشى بولۇپ، چەتئەللىك ئوقۇغۇچىلار ئومۇمىي سانى 6 مىڭدىن ئاشىدۇ). ئۇ يۈرەك تاجسىمان قان تومۇر ئايلىنىشىنىڭ كونترول مېخانىزمى ئۈستىدە تەتقىقات ئېلىپ بارىدۇ. بۇ جەرياندا ئامېرىكا، گېرمانىيە ۋە ئاۋسترالىيە دۆلەت ئىچىدىكى ئىلمىي مۇھاكىمە يىغىنلىرىدا ماقالىلىرىنى ئېلان قىلىدۇ. مۇتەللىپ 2009–يىلى يۈرەك قان تومۇر فىزىيولوگىيە كەسپى بويىچە دوكتورلۇق ئۇنۋانىنى ئالىدۇ.
 


2-رەسىم: مۇتەللىپنىڭ دوكتورلۇق يېتەكچى ئوقۇتقۇچىسى، پىروفېسسور تونى كۋايىل بىلەن 2009-يىلى 6-ئايدا گېرمانىيەنىڭ بېرلىن شەھىرىدە خەلقئارالىق ئىلمىي مۇھاكىمە يىغىنىدا.

مۇتەللىپ دوكتورلۇق ئوقۇشىنى تاماملىغاندىن كېيىن، دوختۇرلۇق كەسپىگە قايتىش ئارزۇسى كۈچلۈك بولغاچقا، دوكتور ئاشتى تەتقىقاتىدىن ۋاز كېچىپ، 2010–يىلى ئاۋسترالىيە دۆلەتلىك دوختۇرلۇق سالاھىيەت ئىمتىھانىنى (ئامك) نەتىجىلىك تاماملايدۇ. (ئامك ئىككى باسقۇچلۇق ئىمتىھان بولۇپ، بىرىنچى باسقۇچ تېببىي ئاساسىي پەنلەر ۋە بارلىق كىلىنىكىلىق پەنلىرىنى ئۆز ئىچىگە ئالىدۇ. ئىككىنچى باسقۇچ كىلىنىكىلىق ئەمەلىيەت ئىمتىھانى. ئامك ئامېرىكىنىڭ دوختۇرلۇق سالاھىيەت ئىمتىھانى ئۇسملا بىلەن باراۋەر). مۇتەللىپ 2011-يىلىدىن ھازىرغىچە ئىلگىرى-كېيىن بولۇپ سىدنىيدىكى Westmead، Liverpool ۋە Royal Prince of Albert قاتارلىق دوختۇرخانىلىرىدا خىزمەت قىلدى. ئۇ ئۆتكەن يىلدىن باشلاپ ئىچكى كېسەللىكلەر كەسپىنىڭ باش ۋىراچلىق خىزمىتىنى قىلىۋاتىدۇ.  ئۇ ھازىر ئايالى رىزۋانگۈل خېلىل، قىزلىرى رەنا ۋە لالە لەر بىلەن سىدنىيدا تۇرىدۇ.
 


3-رەسىم: مۇتەللىپ ئائىلىسىدىكىلەر بىلەن ئاۋسترالىيەنىڭ سىدنىي ئۇنىۋېرسىتېتىدا چۈشكەن سۈرىتى.

مۇتەللىپ كىچىكىدىنلا پەقەت مەقسەت ۋە نىشان ئېنىق بولسىلا، ئۈزلۈكسىز تىرىشىش ئارقىلىق ھەرقانداق ئىشنى ۋۇجۇدقا چىقارغىلى بولىدىغانلىقىغا  چەكسىز ئىشىنەتتى. يەنى ئۇنىڭ دېمەكچى بولغىنى ئىنگلىزچىدىكى: «نىيەت بار يەردە، ئامالمۇ بار» (There is a will, there is a way) دېگەن ئەقلىيە سۆزىدۇر.

iOS ئەپى
Android ئەپى
ئەلداۋا سالونى
ئېلان مۇلازىمىتى
  • ئەلداۋا باياناتى
  • 1. ئەلداۋادىكى تېببىي ساۋات ماقالىلىرىدىن پەقەت پايدىلىنىشقا بولىدۇكى، دىياگنوز-داۋالاشتا ئاساس قىلىشقا ھەرگىز بولمايدۇ. كونكرېت ئىشلاردا يەنىلا دوختۇر ياكى مۇناسىۋەتلىك كەسپىي خادىملارنىڭ پىكىرى بويىچە ئىش كۆرگەيسىز.
    2. ئەلداۋادىكى بارلىق ماقالىلەر پەقەت تارقىتىش ئۈچۈن يوللانغان. بۇ ماقالىنىڭ ئەلداۋادا ئېلان قىلىنغانلىقى - ھەرگىزمۇ بۇ ماقالىدىكى كۆز قاراشلارنىڭ مۇتلەق توغرىلىقىنى ياكى بىزنىڭ شۇ خىل قاراشلارنى ياقىلايدىغانلىقىمىزنى ئىسپاتلىمايدۇ.
    3. ئەلداۋادىكى ماقالىلەرنى باشقا بېكەت، سالونلارغا رۇخسەتسىز كۆچۈرۈشكە بولمايدۇ. ئۇنداق بولمايدىكەن، مۇناسىپ چارە-تەدبىرلەر ئارقىلىق، ھوقۇق-مەنپەئەتىمىزنى قوغداشقا مەجبۇرمىز.
  • مۇناسىۋەتلىك دوختۇرلار