ئېلېكتىرونلۇق تاماكىنىڭ ساغلاملىققا كۆرسىتىدىغان تەسىرى يېقىنقى يىللاردىن بۇيان كۆپ تەتقىق قىلىنماقتا. شىۋېتسىيەدىكى بىر تۈرلۈك تەتقىقات دوكلاتىدا كۆرسىتىلىشىچە، ئاز مىقداردا چېكىلگەن ئېلېكتىرونلۇق تاماكىمۇ قان تومۇرلارغا زىيان يەتكۈزۈپ، يۈرەك كېسىلى ۋە سەكتە پەيدا بولۇش خەۋپىنى ئاشۇرىدىكەن. تەتقىقاتچىلارنىڭ قارىشىچە، ئېلېكتىرونلۇق تاماكىدىكى نىكوتىن قان تومۇرلارنىڭ ئەۋرىشىملىكىنى تۆۋەنلىتىدىكەن. ئېلېكتىرونلۇق تاماكا ئاساسلىقى باتارېيە، قىزىتىپ ھورلاندۇرۇش قۇرۇلمىسى ۋە تاماكا سۇيۇقلۇقى قاچىلانغان تاماكا نەيچىسىدىن تۈزۈلىدۇ. تاماكا سۇيۇقلۇقىدا بەلگىلىك مىقداردا نىكوتىن بولىدۇ. ئىشلەتكەن چاغدا توك بىلەن قىزىتىش ئارقىلىق تاماكا سۇيۇقلۇقى ھورلاندۇرۇلۇپ، ئىس ئۈنۈمى پەيدا قىلىنىدۇ. ئېلېكتىرونلۇق تاماكا چېكىدىغان كىشىلەر ئۇنى ھەر كۈنى تەخمىنەن 250 ـ 300 قېتىم شورايدۇ. يېڭى تەتقىقاتلاردىن مەلۇم بولۇشىچە، ئېلېكتىرونلۇق تاماكىنى كۈنىگە 10 ـ 30 قېتىم سۈمۈرگەن ھالەتتىمۇ سالامەتلىككە كۆرۈنەرلىك تەسىر كۆرسىتىدىكەن، ئەمەلىي تۇرمۇشتا ئېلېكتىرونلۇق تاماكىنىڭ سالامەتلىككە كۆرسىتىدىغان تەسىرى تېخىمۇ چوڭ بولىدىكەن. باشقا بىر تەتقىقاتنىڭ دەسلەپكى نەتىجىسىدىن مەلۇم بولۇشىچە، ئېلېكتىرونلۇق تاماكا كانايدا تارىيىش پەيدا قىلىپ، نەپەسنى قىيىنلاشتۇرىدىكەن. نۆۋەتتە، ئېلېكتىرونلۇق تاماكىنىڭ تاماكا تاشلاشقا ياردىمى بارلىقىنى ئىسپاتلايدىغان يېتەرلىك ئىسپات تېپىلمىدى، تاماكا چەككۈچىلەر پەقەت نىكوتىندىن تەلتۆكۈس ئايرىلغاندىلا سالامەتلىكىنى ئەڭ زور دەرىجىدە ئاسرىيالايدۇ.