ياشانغانلار چېنىقىشىدىكى 4 پەرھىز 4 لازىم

سەھىپە: ياشانغانلار | مەنبە: ئەلداۋا ساغلاملىق تورى | ۋاقتى: 2016/11/16 | كۆرۈلۈشى: قېتىم
ماتېرىيال تەييارلىغۇچى: eldawa03 | تەكشۈرۈپ بېكىتكۈچى: eldawa01 | يوللىغۇچى: ئەلداۋا 03

ياشانغانلارنىڭ بەدەن ئەھۋالى ئۆزگىرىپ تۇرىدۇ، بىر كۈندىكى ئەھۋال يەنە بىر كۈنگە ئوخشىمايدۇ. ھالبۇكى، ياشانغانلاردا پسىخىكا جەھەتتىن ساغلاملىققا بولغان ئىستەكنىڭ كۈچلۈكلىكىدىن، چېنىقىشقا بولغان ئىشتىياق يېلىنجاپ تۇرغان بولىدۇ. ئەمما، ياشانغانلار چېنىققاندا ئۆزىنىڭ بەدەن ئەھۋالى ۋە فىزىئولوگىيىلىك ئەھۋالىغا يارىشا چېنىقىشى، چېنىقىش سالمىقى بىلەن بەدىنىدىكى ئۆزگىرىشلەرنى ياخشى ئىگىلىگەن ۋە كونترول قىلغان ئاساستا چېنىقىشى كېرەك. ئەلداۋا ساغلاملىق تورى ياشانغان دوستلارنىڭ سەمىگە تۆۋەندىكى ياشانغانلار چېنىقىشىدىكى 4 پەرھىز ۋە «4 لازىم» نى ئالاھىدە سالىدۇ.

ياشانغانلار چېنىقىشىدىكى 4 لازىم

1. ھالغا قاراپ ھال تارتىش، خالتىغا بېقىپ ئۇن تارتىش لازىم. يەنى، ئۆزىنىڭ بەدەن ئەھۋالى ۋە چېنىقىش سەۋىيەسىگە ئاساسەن، باب كېلىدىغان چېنىقىش ئۇسۇلىنى تاللاپ چېنىقىش؛ چېنىقىش سۈرئىتى تەكشى، ئاستىراق، سىجىللىقى يۇقىرى ئەمەس، بەكمۇ كۈچلۈك ئەمەس، بىخەتەر، ئاددىيراق چېنىقىش تۈرلىرىنى تاللاپ چېنىقىش لازىم. مەسىلەن، ئاستا يۈگۈرۈش، تېز مېڭىش، يۈگۈرۈش بىلەن مېڭىشنى ئارىلاشتۇرۇپ چېنىقىش، گېمناستىكا ئويناش دېگەندەك.


2. تەرتىپ بويىچە تەدرىجىي چېنىقىش لازىم. يەنى، ھەر قېتىملىق چېنىققاندىكى ھەرىكەتنىڭ مىقدارى مۇۋاپىق بولۇشى، دەسلەپ باشلىغاندا كىچىك، يەڭگىلرەك ھەرىكەتلەردىن باشلاش، بۇ خىل ھەرىكەتنى بىردەم داۋاملاشتۇرغاندىن كېيىن چارچاش ھېس قىلىنمىسا، ئاندىن سەللىمازا كۈچەيتىش ياكى باشقا چوڭراق، ئېغىرراق ھەرىكەتلەرنى ئىشلەش لازىم. ئەگەر ماسلىشىش ئىقتىدارى تەدرىجىي يۇقىرى كۆتۈرۈلسە، بەدەن ساپاسىنىڭ ئېشىۋاتقانلىقىنىڭ ئىپادىسىدۇر.
3. ئىزچىل داۋاملاشتۇرۇش لازىم. بەدەن چېنىقتۇرۇشنى پەقەت ئۇزاق مۇددەت ئۈزۈپ قويماي داۋاملاشتۇرغاندىلا ياخشى ئۈنۈمگە ئېرىشكىلى بولىدۇ. مۇزاينىڭ يۈگۈرۈشى سامانلىققىچە بولۇپ قالسا، ياكى 3 كۈن بېلىق تۇتۇپ، 2 كۈن تورنى ئاپتاپقا سالساق، ھەرقايسى ئورگانىزملار ئۈزلۈكسىز غىدىقلىنىشقا ئېرىشەلمەي، چېنىقىش ئۈنۈمى يوقاپ كېتىدۇ. شۇڭا، چېنىقىشتا چوقۇم ئىزچىل بولۇش لازىم.
4. بىخەتەرلىككە دىققەت قىلىش، تازىلىققا ئەھمىيەت بېرىش لازىم. تەنھەرىكەت بولسا بىر خىل بەدەننى ئىلمىي چېنىقتۇرۇش يولىدۇر. ھەر بىر ھەرىكەتنىڭ رىتىمى، كۈچى، ۋاقتى قاتارلىقلارنىڭ مۇئەييەن قائىدە-قانۇنىيىتى بار. چېنىقىشتىن ئاۋۋالقى تەييارلىقنى ياخشى ئىشلەش، چېنىقىش سورۇنىنىڭ بىخەتەرلىكى ۋە چېنىقىشتىكى بىخەتەرلىككە دىققەت قىلىش، شۇنداقلا، چېنىقىش داۋامىدىكى تەرلەش، سۇ ئىچىش، كىيىنىش قاتارلىقلاردا تازىلىققا ئەھمىيەت بېرىش لازىم.

ئۇنداقتا، ياشانغانلار چېنىقىشتىكى 4 پەرھىز قايسىلار؟

ياشانغانلار چېنىقىشىدىكى 4 پەرھىز

1. ئېغىر نەرسە كۆتۈرۈپ چېنىقماسلىق كېرەك. چۈنكى، ياشانغانلارنىڭ ھەرىكەت ئەزالىرىدىكى مۇسكۇللار يىگىلەشكە باشلىغان، تارىمۇشلارنىڭ ئىلاستىكىلىقى ئاجىزلاشقان، سۆڭەكلەر بوشىغان، بوغۇملارنىڭ ھەرىكىتى چەكلمىگە ئۇچرىغان بولغاچقا، ئېغىر نەرسە كۆتۈرگەندە ئوڭايلا سۆڭەك سۇنۇش، بوغۇم ، تارىمۇش ۋە مۇسكۇللار زەخىملىنىش ئەھۋالى كۆرۈلىدۇ.
2. نەپەس ئالماي چېنىقىشقا بولمايدۇ. ياشانغانلارنىڭ نەپەس مۇسكۇلىنىڭ كۈچى ئاجىزلاپ، ئۆپكە تالاسى بېرىكتۈرگۈچى توقۇلمىسى كۆپىيىپ كەتكەن، ئۆپكە پۈۋەكچىسىنىڭ ئىلاستىكىلىقى ئاجىزلاشقان بولغاچقا، چېنىقىش داۋامىدا نەپەسنى قىسقاندا ( قىسقا مۇددەتلىك نەپەس ئالمىغاندا ) نەپەسلىنىش مۇسكۇلىنى ئوڭايلا زەخىملەندۈرۈپ، ئۆپكە پۈۋەكچىسىنىڭ يېرىلىشىنى كەلتۈرۈپ چىقىرىدۇ-دە، كانايچىلەرنىڭ قانىشىنى پەيدا قىلىدۇ.
3. رىتىمى تېز ھەرىكەتلەرنى ئىشلىمەسلىك كېرەك. ياشانغانلارنىڭ يۈرەك قىسقىرىش كۈچى ئاجىزلىغان، قان تومۇر دىۋارىنىڭ ئىلاستىكىلىقى تۆۋەنلىگەن، تومۇر تارايغان، قان ئايلىنىشقا بولغان توسقۇنلۇق كۈچەيگەن بولغاچقا، يۈرەكنىڭ يۈكى ئېغىر بولىدۇ. بۇندىن باشقا يەنە، نەپەسلىنىش ئىقتىدارىمۇ ئاجىزلىغان بولغاچقا ئوكسىگېن يېتىشمەسلىك ئەھۋالى مەۋجۇد بولىدۇ. رىتىمى تېز ھەرىكەتلەر ئورگانىزمنىڭ ئوكسىگېن سەرپىياتىنى ئاشۇرۇپ، ئوڭايلا ئوكسىگېن يېتىشمەسلىكنى كەلتۈرۈپ چىقىرىدۇ. بولۇپمۇ يۈرەك كېسەللىكى ۋە يۇقىرى قان بېسىم كېسەللىكى بار كىشىلەر رىتىمى تېز ھەرىكەتلەرنى قىلسا تومۇرىنىڭ سوقۇشى تېزلىشىپ، قان بېسىمى تۇيۇقسىز ئۆرلەپ كېتىپ، كۈتمىگەن ئاقىۋەتلەر كۆرۈلۈشى مۇمكىن.
4. مۇسابىقە ياكى ئۆز-ئارا قارشىلىشىدىغان پائالىيەتلەرگە قاتناشماسلىق كېرەك. چۈنكى بۇ خىل پائالىيەتلەر نېرۋىنى جانلاندۇرۇپ، ياشانغانلارنىڭ فىزىئولوگىيىسى بىلەن پسىخكىسىنىڭ ئۆز-ئارا ماسلىشالماسلىقىنى پەيدا قىلىپ، يۈرەك قان تومۇر كېسەللىكى بار كىشىلەردە بەزى ئېغىر ئاقىۋەتلەرنى كەلتۈرۈپ چىقىرىشى مۇمكىن.
 

iOS ئەپى
Android ئەپى
ئەلداۋا سالونى
ئېلان مۇلازىمىتى
  • ئەلداۋا باياناتى
  • 1. ئەلداۋادىكى تېببىي ساۋات ماقالىلىرىدىن پەقەت پايدىلىنىشقا بولىدۇكى، دىياگنوز-داۋالاشتا ئاساس قىلىشقا ھەرگىز بولمايدۇ. كونكرېت ئىشلاردا يەنىلا دوختۇر ياكى مۇناسىۋەتلىك كەسپىي خادىملارنىڭ پىكىرى بويىچە ئىش كۆرگەيسىز.
    2. ئەلداۋادىكى بارلىق ماقالىلەر پەقەت تارقىتىش ئۈچۈن يوللانغان. بۇ ماقالىنىڭ ئەلداۋادا ئېلان قىلىنغانلىقى - ھەرگىزمۇ بۇ ماقالىدىكى كۆز قاراشلارنىڭ مۇتلەق توغرىلىقىنى ياكى بىزنىڭ شۇ خىل قاراشلارنى ياقىلايدىغانلىقىمىزنى ئىسپاتلىمايدۇ.
    3. ئەلداۋادىكى ماقالىلەرنى باشقا بېكەت، سالونلارغا رۇخسەتسىز كۆچۈرۈشكە بولمايدۇ. ئۇنداق بولمايدىكەن، مۇناسىپ چارە-تەدبىرلەر ئارقىلىق، ھوقۇق-مەنپەئەتىمىزنى قوغداشقا مەجبۇرمىز.
  • مۇناسىۋەتلىك ماقالىلەر